ئــاشتی تەیمور

ماریا فوئاد، یەکێکی دیکە  لە خانمە بەهرەمەند، بە توانا، بوێر و لێهاتووەکانی کوردستانە، دە‌رچووی به‌شی میكانیكە له‌ په‌یمانگه‌ی ته‌كنیكی سلێمانی، و له‌ ئێستادا خوێندكاری قۆناغی دووە له‌ به‌شی ئه‌ندازیاری میكانیك.

ماریا وەک یەکەم خانم لەسەر ئاستی کوردستان و عێراق لە ناوچەی پیشەسازی شاری سلێمانی کاری میکانیکی ئۆتۆمبێل دەکات و توانیویەتی شان بە شانی ئەو پیاوانەی کاریان لەگەڵ دەکات بە باشترین شێوە کارەکانی ئەنجام بدات.

 

ماریا جەخت لەوە دەکاتەوە ئەگەر پاڵپشتت هەبێت و چواردەورەکەت هاندەرت بن، ئەوە سەرکەوتنت  لە هەموو بوارەکاندا مسۆگەر دەبێت، بەڵام لە هەمووی گرنگتر بڕوا بەخۆبوونە، لە چاوپێکەوتنێكدا بۆ یەلڵا ماریا دەڵێت (هه‌ر ئه‌وكاته‌ی له‌ په‌یمانگا‌ دەمخوێند دەستم بە  كاركردن كرد به‌ هاوكاری و پشتگیری مامۆستا و هاوڕێكانم و توانیم به‌ردە‌وام بم وبراكه‌م گەورەترین پاڵپشت و هاندەرمە، به‌ڵام له‌ هه‌مووی گرنگتر سوربوون و باوە‌ڕبه‌خۆبوونم بۆ كارەكه‌م بۆ گه ‌یشتن به‌ ئامانجه‌كانم به‌ردە‌وامی زیاتری پێ به‌خشیوم و سوپاس بۆ خوا ئێستا له‌ ئاستێكی زۆرباشم) .

لە درێژەی قسەکانیدا بۆ یەلڵا ماریا دەڵێت (وەکو دەبینین بەهۆی ئەوەی لە کۆمەڵگەی کوردیدا ئەم كارانه‌ ته‌نها پیاو كردوویه‌تی وشتێكی جیاواز بووە و منیش ویستوومە ‌خانمانیش جێ دەستیان دیار بێت له‌م كارانه‌دا،  سەرەتا كه‌ دەستم پێكرد خه‌ڵك هه‌بوون تێڕوانینیان جیاواز بوو ڕه‌خنه‌كان به‌ردە‌وام بوون ، به‌ڵام به‌ڕێوبه‌ری كارە‌كه‌م و هه‌موو كارمه‌ندەكان متمانه‌ی ته‌واویان پێ به‌خشیم كه‌ بتوانم زیاتر كار بكه‌م وحه‌زو خولیام بۆ كارە‌كه‌م زیاتر بێت و سەرکەوتوو بم لە کارەکەمدا،  ئێستاش گه‌ورە‌ترین ئامانج وپلانم خوێندنی ماسته‌رە له‌ بوارە‌كانى (  Automotive Engineering)  له‌ وڵاتی ئه‌ڵمانیا.

لە کۆتایی چاوپێکەوتنەکەیدا بۆ یەلڵا ماریا دەڵێت”من یەکێک بووم لەو کچانەی کە ئەودیواری دواكه‌وتووی و عه‌یبه‌یه‌م ڕووخاند ئه‌و جیاوازیه‌م كه‌مكردەوە،  چونكه‌ خانمانیش شان به‌شانی پیاوان ده‌توانن ڕەنگدانەوەیان هه‌بێت له‌ هه‌موو بوارێكدا.

ماریا به گه‌نجان، و به‌تایبه‌ت به خانمان دەڵێت کە بڕوایان بە خۆیان هەبێت، چونکە بڕوابه‌خۆبوون  كلیلی سەرکەوتنە له‌ هه‌موو بوارە‌كانی ژیاندا هەر بۆیە (ئه‌و بەهرە و خولیایه‌ی كه‌ هه‌ته‌ بۆ كارێك له‌ به‌ركۆمه‌ڵگە و قسه‌ی خه‌ڵك له‌ ناو مه‌به‌ ) دڵنیا به‌ ئه‌و كاته‌ سه‌ركه‌وتوویت كه‌ جیاوازی دروست ئه‌كه‌یت، بۆیه‌ هه‌ر ئێستا ده‌ست پێ بكه‌ !

Loading Facebook Comments ...

اترك تعليقًا

لن يتم نشر عنوان بريدك الإلكتروني. الحقول الإلزامية مشار إليها بـ *