کنێر عه‌بدوڵڵا

بیروڕاکان تایبه‌ت به‌ فیمینیزم جۆراوجۆرن، به ‌شێوه‌یه‌ک ده‌توانرێت بگوترێت قوتابخانه‌ی جیاجیای فیمینیزمی هه‌ن، ئه‌گه‌رچی جیاوازییان له‌گه‌ڵ یه‌کتریدا هه‌یه‌، به‌ڵام خاڵی هاوبه‌شیان هه‌یه‌ که‌ به‌ درێژایی مێژووی سه‌رهه‌ڵدانی ئه‌و قوتابخانانه‌، کارکردن بۆ ‌نه‌هێشتنی به‌رده‌وامی و درێژه‌ی هه‌یه‌.

یه‌کێک له‌و خاڵه‌ جه‌وهه‌رییه‌ هاوبه‌شانه‌ی نێوان قوتابخانه‌کانی فیمینیزم، بریتیه‌ له‌ باوه‌ڕبوون به‌وه‌ی هۆکاری سه‌رهه‌ڵدانی هه‌ر یه‌که‌یان ده‌گه‌ڕێته‌وه‌ بۆ ناجێگیری و کۆی ئه‌و جیاکارییانه‌ی  ده‌رهه‌ق به‌ ژنان ده‌کرێن، بێگومان ئه‌وه‌ش به ‌هۆی ڕه‌گه‌زیانه‌وه‌یه‌ که‌ ژنن، ده‌چه‌وسێنرێنه‌وه‌، توندوتیژیان به‌رامبه‌ر ده‌کرێت، به‌ ڕه‌گه‌زی پله‌ دووی مرۆڤایه‌تی سه‌یر ده‌کرێن و ده‌رفه‌تی یه‌کسانیان له‌گه‌ڵ پیاواندا وه‌کیه‌ک نابێت، له‌ زۆربه‌ی بواره‌کاندا ئه‌رک و مافه‌کانیان وه‌ک یه‌ک نیه‌ و له‌ به‌های مرۆڤبوونیان که‌م ده‌کرێته‌وه‌.

ئه‌و جیاکاریانه‌ له‌ سه‌رتاسه‌ری وڵاتانی جیهاندا درێژه‌ی هه‌یه، بۆیه‌ له‌‌پێناو ئه‌و ئامانجانه‌دا تا ئه‌مڕۆ خه‌باتی جیای بۆ ده‌کرێت، ئیتر ئه‌و واقیعانه‌ بووه‌ هۆی سه‌رهه‌ڵدانی فیمینیزم‌.

فیمینیزم، وشه‌یه‌كی فه‌ڕه‌نسیه‌و به‌ مانای‌ ژن (woman) وه‌رگیراوه‌، بزوتنه‌وه‌یه‌كه‌ هه‌وڵ بۆ سه‌لماندن و به‌ده‌ستهێنانی‌ مافه‌ كۆمه‌ڵایه‌تی‌،ئابوری‌ و سیاسیه‌كانی‌ ژنان ده‌دات، چه‌مکێکی فره‌ڕه‌هه‌نده‌و  کۆمه‌ڵێک بیرو بۆچوونی له‌خۆگرتووه، بۆیه‌ بۆ ئه‌وه‌ی پێناسه‌یه‌‌کی بنه‌ڕه‌تی بۆ بنه‌مای هاوبه‌شی کۆی فیمینیسته‌کان بکه‌ین، ده‌توانین هه‌وڵی دۆزینه‌وه‌ی تایبه‌تمه‌ندییه‌ هاوبه‌شه‌کانی هه‌موو جۆره‌کانی فیمینیزم بده‌ین.  

له‌و ڕوانگه‌یه‌وه‌ ده‌توانرێت فیمینیزم، به‌و بزووتنەوە و بڕوایانه‌ بگوترێت کە مەبەستیان دامەزراندن و پاراستنی مافی وه‌کو یه‌که‌ بۆ ژنان له‌ ڕووی سیاسی،ئابوری و کۆمەڵایەتییەوه‌، بێگومان فیمینیزم جۆری زۆره‌ گرنگترینیان بریتین له‌، لیبراڵه‌کان، ڕادیكاڵه‌کان، سۆسیالیسته‌کان و بایه‌لۆژیسته‌كان

بۆیه‌ فیمینیزم خۆی له‌ خه‌بات و کۆششی ژنان، یان هێنانه‌دی ئامانجی ڕاسته‌قینه‌ی ژناندا ده‌بینێته‌وه‌ بۆ گشت‌، نه‌ک ته‌نیا بۆ تاک، بۆ پیاویشه‌، نه‌ک ته‌نیا بۆ ژن، بۆ هێنانه‌دی کۆمه‌ڵگه‌یه‌کی مرۆڤ دۆست و شارستانی گه‌شه‌کردووه‌، نه‌ک بۆ کۆ‌مه‌ڵگه‌یه‌کی کۆپیکراوی تر که‌ ته‌نیا ژن تیایدا باڵاده‌ست بێت و هه‌وڵی زاڵێتی خۆی و ژێرده‌سته‌یی پیاو بدات، بۆ به‌رجه‌سته‌بوونی ژینگه‌یه‌که‌ مرۆڤ سه‌نته‌ر و چه‌قی بڕیاردان بێت، نه‌ک به ‌هۆی جیاوازی ڕه‌گه‌زییه‌وه‌ جیاکاری و فه‌رامۆش و وه‌لانان و په‌راوێزخستنی ڕه‌گه‌زێک بکرێت له‌سه‌ر حسابی ڕه‌گه‌زه‌که‌ی دیکه‌،  واقعێک‌ ژن و پیاو که‌رامه‌تیان پارێزراو بێت و هه‌ر یه‌که‌یان وه‌ک مرۆڤ و دواتر وه‌ک ڕه‌گه‌زیش شانازی و پشت به‌ توانا و لێهاتوویی و کارامه‌یی خۆیان‌ ببه‌ستن، نه‌ک به ‌هۆی ناسین و خزم خزمێنه‌ و ده‌سه‌ڵاتدار و که‌لتوری باوی زاڵیتی ڕه‌گه‌زێکه‌وه‌ ڕاستی و جوانی و تواناکانی لایه‌نه‌که‌ی تر نه‌خوێنرێته‌وه‌ و به‌هه‌ند وه‌رنه‌گیرێت.

به‌ واتایه‌کی دیکه‌، فیمینیزم ئامانجی کارکردنه‌ بۆ به‌دیهێنانی جیهانێک  بۆ هه‌مووان بێت، جیهانێکی باشتر و گونجاوتر و باشتر، دونیایه‌ک نه‌ک ته‌نیا بۆ ژنان، به‌ڵکو  بۆ پیاوانیش جیهانێکی ئارامتر بێت و هه‌ردووکیان وه‌ک مرۆڤ مامه‌ڵه‌یان له‌گه‌ڵدا بکرێت.

Loading Facebook Comments ...

اترك تعليقًا

لن يتم نشر عنوان بريدك الإلكتروني. الحقول الإلزامية مشار إليها بـ *