Find anything you need on Yalla

با لە خۆمانەوە دەست پێ بکەین

0

داستان محمد

مانگی پێشوو پرسیاری گەنجێك لە پێشكەشكاری یەکێک لە بەرنامەکانی کەناڵێکی سەتەلایەتی کوردی سەرنجی بۆ بابەتێکی گرنگ ڕاکێشام، دڵنیا نیم باسی سەرەکی بەرنامەکە چی بوو،  بەڵام وا دیار بوو لە تەوەری کارکردنی گەنجاندا دەسوڕایەوە، گەنجەکە لە پێشکەشکاری بەرنامەکەی پرسی  ”….. خان ، بەڕێزتان بۆ لە کەناڵەکەی خۆتانەوە دەست پێناکەن و یارمەتی گەنجان نادەن و لە جێگای ئەو کرێکارە بیانیانە دایانبمەزرێنن کە لەکەناڵەکەتان کاردەکەن” مەبەستی گەنجەکە ئەو کرێکارانە بوو کە کاری خاوێنکردنەوە دەکەن، پێشکەشکارەکە  پێشتر کە بەرگری لە هاندانی گەنجان بۆ کارکردن و ئەو باسانە دەکرد و لە بری ئەوەی پشتگیری  لە  داوای ئەو گەنجە بکات ، بە پێچەوانەوە بەرگری لەو شێوازە کرد کە کەناڵەکەی بۆ دامەزراندنی کرێکارەکان دەیگرێتە بەر ولە وەڵامدا ووتی” گەنجانی ئێمە نایەن ئەو کارە بکەن، چونکە زۆر پارەیەکی کەم دەدرێت بەو کرێکارانە وهیچ گەنجێک ڕازی نییە بەو پارەیە ئیش بکات” ، هەرچەندە گەنجەکە لە وەڵامدا ووتی کە ئێستا زۆر گەنج هەن بەو بڕە پارە کەمەش کاردەكەن، بەڵام گفتوگۆکە لەو خاڵەدا کۆتای پێهات.

لە هێنانەوەی ئەو نموونەیەی سەرەوەدا مەبەستم لەو پێشکەشکارە بەڕێزە و کەناڵەکە نییە،  بەڵکو مەبەستم لە هەموو تاکێکی ئەم کۆمەڵگەیەیە، با لەگەڵ خۆمان ڕاستگۆ بین، لە قسە کردندا ئێمە هەموومان زۆر شت دەزانین و هەزارەها چارەسەر وتێبینی و پێشنیارمان هەیە بۆ باس کردن،  بەڵام ئایا کاتێک ئێمە ڕووبەری بارودۆخێک دەبینەوە ئەوەی هەمیشە دەیڵێین جێ بەجێی دەکەین؟ ئەگەر بێت و لە قازانجی خۆشماندا نەبێت؟

لە ئینگلیزیدا بەم دیاردەیە دەوترێت ( Hypocrisy) کە بە وەرگێڕانێکی ڕووت دەبێت بە (دوو ڕوویی) لە کوردیدا، بەڵام مەبەستی من لێرەدا دوو ڕووی نییە بەڵکو زیاتر مەبستم لەوەیە ئێمە هەموومان لە ئامۆژگاری کردندا لێهاتووین، بەڵام جێبەجێ ناکەین،  لە کوردیشدا پەندێکمان هەیە بۆ ئەم مەبەستە کە دەڵێین ” بە قسەم بکە بەڵام بە کردارم مەکە ”

بۆ هەمیشە دەبێ پێشنیار و ڕەخنەی ئێمە لە کەسانی بەرامبەر بێت ، بۆ بییر نەکەینەوە کەوا دەکرێت ڕەخنە لە خۆمانیش بگرین و ئەو پێشنیارانەی کە هەشمانە سەرەتا لە ژیانی خۆماندا جێ بەجێی و پەیڕەوەیان بکەین دواتر بە بڕوایەکی پتەوتر و ئەزموونێکی باشترەوە دەتوانین یارمەتی کەسانی دیکەش بدەین بۆ ئەوەی بتوانن سوود لە ئەزموونەکەی ئێمە وەربگرن.

لە کۆتاییدا دەڵێم هیچ کەسێک لە خۆمان باشتر ناتوانێت بڕیار لەسەر خۆمان بدات، خۆمان باشترین دادوەرین بۆ خۆمان،  بۆیە با هەمیشە ئەو دادوەرە هەڵسەنگاندن بۆ کارەکانمان بکات پێش ئەوەی هیچ کەسێکی دیکە جیاوازی لە نێوان وتەو و کردارەکانماندا بدۆزێتەوە.

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!