Find anything you need on Yalla

خەندەقی کەرکووک: چەسپاندنى ئاسایش یان دیاریکردنى سنوور؟

0

سەلام زێدان – یلا/ کەرکووک

هەڵکەندنى خەندەق لەلایەن هێزی پێشمەرگە لە دەوروبەری پارێزگاى کەرکووک قسەو باسی زۆری بەدواى خۆیدا هێناوە لە ناوەندە سیاسیەکانى عێراق.

پارێزگاى کەرکووک نەجمەدین کەریم لە پرێس کۆنفرانسێکدا کە “یلا” ئامادەی بوو وتى: “هەڵکەندنى خەندەق لە دەوروبەری پارێزگاى کەرکووک بۆ چەسپاندنى ئاسایشی زیاتر و پاراستنی کەرکووکە لە هێرشی تیرۆریستی، بە هیچ شێوەیەک مەبەست لێی دیاریکردنى سنور و دابەشکردنى عێراق نیە”، ئەوەشتی خستە ڕوو کە “پێشمەرگە مافی خۆیەتى کە خەندەق لێبدات بۆ قایمکردن و پاراستنى سنورەکانى هەروەک چۆن هێزەکانى تریش مافی خۆیانە کە خەندەقیان هەڵکەندە لە ناوچەى نەخیب لە پارێزگاى کەربەلا”.

پارێزگاری کەرکووک وتیشی “ئەوانەى رەخنە لە هەڵکەندنى خەندەقەکەى پێشمەرگە دەگرن دیارە نایانەوێت پێشمەرگە لە شەری لە دژی داعش سەرکەوتن بەدەست بهێنێت”.

درێژی خەندەقەکەى کەرکووک ١٠٠ کیلۆمەتر دەبێت و لە هەریەک لە پارێزگاکانى موسڵ و کەرکووک و دیالا درێژ دەبێتەوە.

لەلایەن خۆیەوە (خالد ئەلمەفرەجی) پەرلەمانتار لە کوتلەى گردبوونەوەى هێزە عێراقیەکان کە گردبوونەوەى هێزە سونیەکانە بۆ یلا وتى “ئامانج لە هەڵکەندنى خەندەق لە دەوری کەرکەووک بەهێزکردنى ئاسایشی پارێزگاکەیە لەرێی توند تۆڵکردنى سنورەکان کە جگە لە هەڵکەندنى خەندەق، چەسپاندنى ساتر و دانانى بورجی چاودێریش لە خۆ دەگرێت”.

ئەلمەفرەجی کە نوێنەرایەتى کەرکووک دەکات لە پارێزگاى کەرکووک وتیشی “ئیدارەی کەرکووک پەیوەندی بە لایەنەکانى کەرکووک کردووە و پێی راگەیاندوون کە هەڵکەندنى خەندەق ئامانجی سیاسی لە پشتەوە نیە و بۆ دیاریکردنى سنوور نیە”، وتیشی “هەندێک دەیانەوێت ناکۆکی بخەنە نێو لایەنەکانى کەرکووک بەهۆى هەڵکەندنی خەندەق”.

لەلای خۆیەوە سەرۆکى لیستی هاوپەیمانى نیشتمانى (کازم ئەلشەمەری) بۆ یلا وتى “ئەم زانیاریانەى لە پارێزگاى کەرکووکەوە دێن لەبارەى هەڵکەندنی خەندەق ئەگەر راست بێت ئەوە هەنگاوێکە بەرەو دابەشکردنى وڵات و جێگاى قەبوڵ نیە”، ئەلشەمەری وتیشی “دەستپێشخەریەک لەلایەن سەرۆکی هاوپەیمانى نیشتمانى ئەیاد عەلاوی هەیە بۆ دروستکردنەوەى متمانە لەنێوان هەرێمی کوردستان و حکومەتى ناوەندی، بەڵام هەڵکەندنی خەندەق دەبێتە بەربەست لەبەردەم ئەم دەستپێشخەریە”.

ئەو پەرلەمانتارە واى دەڕوانێت کە “هەڵکەندنی خەندەق لە کەرکووک هاوتەریبە لەگەڵ ئەم دروشمانەى هەرێمی کوردستان کە سنورەکانیان لە زاخۆ تا جەلەولایە، ئەمەش برینەکان قوڵتر دەکاتەوە و پرۆسەى ئاشتبوونەوەى نیشتمانى قورستر دەکات”، لەبارەى خەندەقی نێوان ئەنبار و کەربەلاش وتی: “هەڵکەندنى خەندەق لەنێوان ئەنبار و کەربەلا جیاوازە لە خەندەقی کەرکووک چونکە ئەوەى کەربەلا ئامانج لێی دزەکردنى چەکدارانى داعشە بۆ کەربەلا و چونکە ئەم ناوچەیە زۆر فراوان و گەورەیە و کۆنترۆڵکردنى زۆر قورسە”.

وتەبێژی حکومەتى ناوەندی لە بەغدا رەتیکردنەوە هیچ کۆمێنتێک لەسەر پرسی هەڵکەندنى خەندەقی کەرکووک بدات و تەنها ئەوەى وتى کە ئاگاداری ئەم هەنگاوەى حکومەتى هەرێم نین.

لەلایەکى ترەوە پەرلەمانتار لە هاوپەیمانى دەوڵەتى یاسا (سەعد مەتڵەبی) بۆ یلا وتى “هەڵکەندنى خەندەق بۆ رێگریکردنى لە داعش مایەی پێکەنینە چۆنکە ئەگەر چیای حەمرین نەیتوانی بێت رێگری لە بەرەوپێشچوونى داعش بکات چۆن خەندەقێک بە قوڵایی چوار مەتر دەتوانێت بیکات”.

جەختیشی لەوە کردوە کە “هەڵکەندنی خەندەق لە کەرکووک ئامانجی تری هەیە و هیچ پەیوەندی بە داعشەوە نیە، پێمان وایە ئامانج لێی دیاریکردنى سنوری هەرێمی کوردستان و دواتر راگەیاندنى دەوڵەتی کوردیە”.

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!