Find anything you need on Yalla

کەرکوک پێکەوە ژیان تێیدا بەردەوام دەبیت.

0

یەڵڵا – ئیلیان قەرەداغی
کەرکوک یەکێک لە زەحمەتترین و قورسترین رۆژی لە مێژووی خۆیدا بەڕێکرد، بێ ئەوەی پێشبینی هەندێک کەس بێتەدی، کە وایان لێکدەدایەوە ئەو شارە فرە رەنگ و نەتەوە و پێکهاتەیە لە ریفراندۆمی سەربەخۆیی کوردستاندا سەلامەت نابێت.
رۆژی 25ی ئەیلول، رۆژی دەنگدانی ریفراندۆمی سەربەخۆیی کوردستان بوو، کە تا دواساتەکان یەکلانەببوەوە ئایا کەرکوک و ناوچەکانی دەوروبەری بەشداری ریفراندۆم دەکەن یان نا؟ چونکە گوشارە ناوخۆیی و دەرەکییەکان بۆ دورخستنەوەی ئەو پارێزگایە لە ریفراندۆم گەیشتبوە لوتکە، بەڵام بێ هیچ کێشە و گرفتێک هەنگاوەکە بە ئەنجام گەیشت و هەمووان چاوەڕوانن ئەنجامەکەی بزانن.
پرسیاری ئایندەی کەرکوک لە دوای ریفراندۆم چی لێدێت؟ لە زهنی هەمواندایە، لەوبارەیەوە شاخەوان عەبدوڵڵا پەرلەمانتاری کەرکوک لە ئەنجومەنی نوێنەرانی عیراق بە “یەڵڵا”ی وت “لایەن هەبوو ئومێدیان لەسەر ئەوە هەڵچنیبوو، کە کورد پێکهاتەیەک عاجز بکات و کارێک بکات تا بیانوو بدات بەدەستەوە بۆ هاتنی سوپای عیراق بۆ شاری کەرکوک، بەڵام ئەو ئومێدەیان لە شوێنی خۆیدا نەبوو”.
ئاماژەی بۆ ئەوەشکرد پێش ریفراندۆم کورد شەهید و برینداری لە بانگەشەی پرۆسەکەدا دا، بەڵام کورد خۆی لە هەموو شتێک پاراست و کاردانەوەی نەبوو. دوێنێ لەکاتی بەڕێوەچوونی پرۆسەی دەنگدانیش، هەندێک ئیستیفزازی کورد کرا لە هەندێک ناوچەی پارێزگای کەرکوک، بەڵام هەمووان دانیان بە خۆیاندا گرت و وەڵامی ئەو تەقەکردن و هەڵسوکەوتانە نەدرایەوە، کە هەندێک لایەن دەیانویست لەوێوە کێشەی گەورە دروست بکرێت.
ئەو پەرلەمانتارە کوردە جەختیشیکردەوە، خیتابی ئەمڕۆی کورد و وڵاتانی دەوروبەریش لەگەڵ دوێنێ گۆڕاوە و جیاواز بووە، بۆیە پێویستە عیراقیش بە هەمان شێوە خیتابی خۆی بەرامبەر کورد بگۆڕێت. وتیشی “هیچ وڵاتێکی دەوروبەر لە غەمی کەرکوکدا نین، بەڵکو بەرژەوەندییان هەیە، بۆیە ئەگەر عیراق لە غەمی کەرکوکدایە، با بێت کێشەی ئەو ناوچانە هەمووی یەکلابکاتەوە، کە بەپێی دەستور دیاریکراوە. بەڵام ئیتر لە دوێنێوە خەڵکی پارێزگاکە بڕیاری خۆیانیان دا و ئینتیمای خۆیان بۆ کوردستان راگەیاندوە نەک عیراق”.
شاخەوان عەبدوڵڵا لەبارەی ئایندەی پارێزگای کەرکوکیشەوە پێیوایە کەرکوک دەبێتە هەرێمێک لەنێو دەوڵەتی کوردستاندا و پێکهاتەکانی وەک تورکمانیش دەبنە خاوەنی هەموو مافێک و پلە و پێگەی پێویستیان پێدەدرێت، ئەوانیش وەک کورد هەرێمەکەیان وەک چاویان دەپارێزن.

لە هەمان چوارچێوەدا، ئازاد جەباری سەرۆکی لیژنەی ئەمنی لە ئەنجومەنی پارێزگای کەرکوک بە “یەڵڵا”ی راگەیاند، کورد نایەوێت بە عاجزبوون لە عیراق جیاببێتەوە، بەڵکو دەیەوێت بە گفتوگۆ وەک برا جیاببنەوە بێ ئەوەی هیچ کێشە و گرفتێک بێتەئاراوە.
ئاماژەی بۆ ئەوەشکرد، کە کورد بە درێژایی مێژوو، زانا و کەسایەتی زانستی و فەیلەسوفی پێشکەش بە عیراق کردوە، تەنانەت کورد شەهیدی داوە بۆ عیراق و لەهەندێک ناوچەدا بەرگرییان لە عەرەب کردوە کە خاکەکەشی کوردستان نەبووە، بەڵام ئێستا عیراق خۆی پاڵ بە کوردەوە دەنێت و دەیەوێت جیاببێتەوە.
دەشڵێت “دەبێت کورد و عیراق رێکبکەون و ئەستۆپاکی بکەن، نابێت تەشەنوج هەبێت، لەگەڵ ئەوەشدا قبوڵ ناکەین دۆسێی کەرکوک بچێتەدەرەوە، بەڵکو لە ناوخۆدا چارەسەر بکرێت. کەرکوکیش شارێکە لە شارەکانی کوردستان و فیدرالی دەبێت، بەوشێوەیەش لەئایندەدا کەرکوک بە ئیستیحقاقی هەڵبژاردن بەڕێوەدەبرێت و هەمووانیش بەشدار دەبن تێیدا”.
لەلایەن خۆیەوە سیهام مستەفا رۆژنامەنوس وبێژەر لە نەتەوەی عەرەب کەلە دەزگایەکى ڕاگەیاندنى زۆر دیار لەکوردستان کار دەکات جەختدەکاتەوە، خۆشەویستی و برایەتی و دۆستایەتی و رێز و چاکە لەگەڵ برا کوردەکان پێکەوە کۆمان دەکاتەوە و هاووڵاتین پێکەوە ولەَگەل هاوکارانم لەم دەزگایە هەست دەکەم یەکێکم لەمان .
ئەو خانمە رۆژنامەنوسە بە “یەڵڵا”ی وت “ڕەنگە جیابونەوەی جەستەیی هەبێت، بەڵام تێکەڵبونی روحی بەسەر پەیوەندییە مرۆییەکانی نێوانماندا زاڵ دەبێت”.
دەشڵێت “تا هەتا هەتایە دروشمی هەربژی کورد و عەرەب دەڵێینەوە”.

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!