Find anything you need on Yalla

دووڕوویی و ڕیایی مرۆڤ

0

کنێر عه‌بدوڵڵا

كەم نین ئەو مرۆڤانه‌ی خۆیان بەكەسانی ڕاستگۆ دەزانن، به‌ڵام دڵیان لەڕاستیدا پڕاوپڕە لەرق وكینە، وه‌ زۆرن ئه‌وانه‌ی مومارەسەی دووڕوویی دەكەن لە نەزانینەوە یان بەمەبەست بێت و هەندێكی دیكەش بێدەنگ دەبن لەهەڵەی ئەوانیتر، بەمەبەستی ڕیاییکردن لەسەر حسابی ڕاستییه‌کان.

دووڕوویی، نەخۆشییەكی مەترسیدارە، نەك تەنها لەئاستی ناوخۆیی، بگرە لە ئاستی جیهانیشدا بوونی هەیە، بەڵام تەشەنەسەندنی لە ووڵاتانی ڕۆژهەڵات زیاتر دەردەكەوێت،  بەدیوێكی تردا  بەمانای جۆرێك لەگەندەڵی دێت و دەبێتە هۆی زیادكردنی ڕق وكینە وناخۆشی و جەنگ و بڵاوبونەوەی ڕەفتاری ناشرین وهەڵخەڵەتاندن و خراپە كە دەرهاوێشتەی مەترسیدارن و دەبێتە هۆی شەكەتبوونی جەستەی نەتەوەو كاریگەری بەجێدەهێڵێ، وێڕای لاوازبوونی متمانە لە نێوان خەڵكداو رێگری كردن لەبەردەم هاوكارو یارمەتیكردنیاندا كە دواجار ڕەنگدانەوەی دەبێت لەسەر ژیانی سروشتی؛ بەمەش كۆمەڵ بەرەو ناهاوسەنگی، شڵەژان، تێكچوون، لاوازی و دواخستنی  گەشەكردنی كۆمەڵ.

ڕیایی، یەكێكە لەودیاردە كۆمەڵایەتیانەی بەشێوەیەكی بەرفراوان بوونی هەیە لەكۆمەڵە رۆژهەڵاتییەكاندا،  دەركەوتنی ئەم دیاردەیە جێی تێبینی بوو لەسەر ئاستی گشتی وكەسێتی و پاشان رەنگدانەوەی بەسەر كۆمەڵەوە.

بوونی ئەم دیاردانه‌ هەڕەشەیەكی گەورەیە بۆ چەسپاندنی راستگۆیی و جێبونەوەی كەسانی راستگۆ، ئەوەش له‌م كۆمەڵەدا بۆتە پاساوێك بۆ پەردەپۆشكردنی ڕاستییەكان وەك ئەوەی بە مرۆڤەكان بڵێ راستگۆیی شتێكی رەتكراوەیە و ئەوەی كاری پێ بكات دەچێتە دەرەوەی چوارچێوەی كۆمەڵی داپۆشراو بەدرۆكردن، ماندوو دەبێت لەژیان و كار و پەیوەندییەكاندا پرسیارەكە ئەوەیە ئایا ئەوە ڕاستە؟

دووڕوویی و ڕیایی مومارەسەیەكی بەفێربوونه‌ تاكڕەوانە بێت یان بەكۆمەڵ؛ ئامانج لێی بەرهەمهێنانی پەیوەندییەكە لە دەرەوەی مەرجەكانی هەر بوارێك دەیخوازێ لەڕووی ئابوری، كۆمەڵایەتی،  رۆشنبیری، مەدەنی و سیاسییەوە كە تاك تیایدا ژیان دەگوزەرێنێ لەچوارچێوەی كۆمەڵ یان كۆمەڵێك یاخود چین و سیكتەرێك كە ئینتمای بۆی هەبێت، لەپێناو بەدیهێنانی ئامانجی دیاریكراو كە ناگونجێ لەگەڵ كەسایەتی تاكی پیادەكەر، لەو ڕوانگەیەوە دەردەكەوێت كە دووڕووی و ڕیایی گرێدراوی فێربوونی تاك و بەكۆمەڵە، هەروەها بەرهەمی كۆمەڵایەتی و په‌روه‌رده‌ی نادروستە، لەهەمان كاتدا پیادەكردنێكە دەبێتەهۆی بەرهەمهێنانی زیاتری نەخۆشییە كۆمەڵایەتییەكان كە دەربازبوون لێی قورسە،  هەروەها  گەندەڵبوونی پەیوەندی بەڕێوەبردن، بەشێوەیەك كە ناسین وخزم خزمێنه‌ رۆڵ دەگێڕێ، جیاوازە لەگەڵ ڕیاییکردن بە مانا ڕاستەقینەكەی که‌  مەبەست لێی درۆكردنە لەگەڵ دەوروبەردا ، بۆ بەدەستهێنانی مەبەست و بەرژەوەندییەکانی مرۆڤ؛ بۆیه‌ که‌لتورو سسته‌می په‌روه‌رده‌یی رۆڵی سه‌ره‌کی ده‌گێڕێت له‌ داماڵینی مرۆڤه‌کان له‌و جۆره‌ خه‌سڵه‌تانه‌ و کارپێکردنیش بۆ جێبه‌جێکردنی ئه‌و داماڵینه‌ ئه‌رکی هه‌مووانه‌.

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!