زاگرۆس لە دوو فێستیڤاڵدا سێ خەڵاتی بەدەستهێناوە

0

یەکەم فیلمی درێژ و نوێترین فیلمی سینەمایی سەهیم عومەر خەلیفە، سینەماکاری کورد بەناوی “زاگرۆس”، لە دووەم بەشدارییكردنی لە فێستیڤاڵە نێودەوڵەتییەکاندا، دوو خەڵاتی گرنگی بەدەستهێنا.

ئەم بەرهەمە سینەماییە، لە بەشی پێشبڕکێی 18یەمین خولی فێستیڤاڵی نێودەوڵەتیی فیلمی ئاڕەس بەشداربوو و خەڵاتی باشترین دەرهێنەری لەلایەن لیژنەی دادوەریی فێستیڤاڵ و خەڵاتی باشترین فیلم لەلایەن بینەرانەوە، پێبەخشرا. 

جگە لە دەرهێنەری فیلم، حەلیمە ئێلتەر، ئەکتەری سەرەکی فیلم وجەین – کلود کە لە نووسینی سیناریۆکەدا بەشداربوون ، لە فێستیڤاڵەکەدا ئامادەبوون.

فێستیڤاڵی ئاڕەس لە 3 تاوەکو 12 تشرینی دووەم/ نۆڤێمبەر لە شاری ئاڕەس لە فەڕەنسا بەڕێوەچوو.

ئەم بەرهەمە سینەماییە لە مانگی ڕابردوو، لە یەکەم بەشداریی لە فێستیڤاڵە نێودەوڵەتییەکاندا، لە 44مین خولی فێستیڤاڵی نێودەوڵەتیی فیلمی گێنتدا بەشداربوو کە بە گەورەترین فێستیڤاڵی سینەمایی لە بەلژیکا دەناسرێت و خەڵاتی گەورەی فێستیڤاڵی بەدەستهێنا کە خەڵاتی “Grand Prix” بوو.

لە بەشی پێشبڕکێی فێستیڤاڵدا ١٢ فیلم لە پێشبڕکێدا بوون و “زاگرۆس” تاکە فیلمی کوردی – بەلژیکییە لە مێژووی فێستیڤاڵدا، ئەو خەڵاتە بەدەست بهێنێت،  و تاکە فیلمی ئەو وڵاتەش بوو لە بەشی پێشبڕکێدا.

بەشداری ئەم بەرهەمە سینەماییە کە چیرۆکێکی کوردی هەیە و گرێدراوی وڵاتی بەلژیکایە، دووەم بەشدارییە لە فێستیڤاڵە جیهانییەکاندا.

هەر ئەم فیلمە لە بەشی پێشبڕکیی ١٤مین خولی فێستیڤاڵی نێودەوڵەتیی فیلمی دوبەی، ٢٨مین خولی فێستیڤاڵی نێودەوڵەتیی فیلمی ستۆکهۆڵم، ٣٨مین خولی فێستیڤاڵی نێودەوڵەتیی فیلمی ڤیرتۆن و هەشتەمین خولی فێستیڤاڵی نێودەوڵەتیی فیلمی ڕامادا بەشداردەبێت.

لەم بەرهەمە سینەماییەدا، هەریەکە لە فەیاز دۆمان، حەلیما ئێلتەر و سوات ئۆستا و هونەرمەندی گۆرانیبێژی ناسراوی کورد، هۆزان برادەر، رۆڵ دەگێڕن.

“زاگرۆس” بەرهەمێکی هاوبەشی بەلژیکا و هۆڵەندایە، پرۆدیۆسەری سەرەکی فیلمەکە دریس فالیپۆیە و سەهیم عومەر، جەین- کلود و ڤان ریچکهام سیناریۆکەیان ئامادەکردووە.

کارێ وێنەگرتن، دەنگ و مۆنتاژی فیلمەکە، لەلایەن سینەماکارانی بەلژیکی و هۆڵەندییەوە کراوە.

فیلمی “زاگرۆس” چیرۆکی شوانێک بەناوی زاگرۆس دەگێڕێتەوە کە هاوژینی خۆی زۆر خۆشدەوێت، بۆ ئەو کوردستان بەهەشتە، بەڵام هاوژینەکەی هاڤین و کچەکەی ڕەیهان، روودەکەنە بەلژیکا، دواتر زاگرۆزیش بڕیاردەدات بچێتە ئەو وەڵاتە.

لە بەلژیکا زۆر شتی نوێ لەبارەی هاوژینەکەیەوە دەزانێت و متمانەی جارانی پێ نامێنێت، بۆیە دەخوازێت جارێکی دیکە بگەڕێتەوە نیشتمان.

سەهیم عومەر خەلیفە، پێشتر لەرێگەی کورتەفیلمی “میسی بەغداد”، “وڵاتی پاڵەوانان” و “نێچیرڤانی خراپ”، ٩٨ خەڵاتی لە فێستیڤاڵە سینەماییەکاندا وەرگرتووە.

دوو ساڵ بەسەریەکەوە کورتە فیلمی “میسی بەغداد”، دواتریش “نێچیرڤانی خراپ”، لە لیستی 10 کورتە فیلمە کاندیدکراوەکان بوون بۆ خەڵاتی ئۆسکاری باشترین کورتە فیلم.

*راگەیاندنی گشتیی فیلمی سینەمایی ” زاگرۆس” لە باشووری کوردستان

بابه‌تی تر بابه‌تی هاوشێوه‌

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!