هاوڕێیەتی “كچان وكوڕان” وەک پەیوەندییه‌کی مرۆیی

0

كنێر عەبدوڵڵا

مرۆڤەكان هەمیشە لە نێوەندی كۆمەڵدا لە ململانێكاندا ژیان دەگوزەرێنن، بەو واتایەی هەمیشە  لە نێوان بیروباوەڕ و ئیرادەكانیان لە لایەك و نەریت و كەلتوری كۆمەڵ لە لایەكی دیكە ڕوبەڕووی پێكدادان دەبنەوە .

ڕاسته‌ هەر كۆمەڵگەیەك كەلتورێكی تایبەت بەخۆی هه‌یه‌ و بەهۆیەوە مرۆڤەكان دەكەونە بەردەم جێبەجێكردن و پیادەكردنی سەرجەم ئەوانەی فێركراون، بەڵام ڕاستییەكی حاشا هەڵنەگریش هەیە بەوەی دەشێت زۆرێك لەو نەریتانە بە پێی گۆڕانكاری دۆخ و پێشكەوتن و بیروباوەڕەكانی مرۆڤەكانەوە پێویستی بە پیاچونەوە و گۆڕانكاری هەبێت، پرسیارەكە ئەوەیە كێ بەرپرسیارە و كێ هەوڵی ئەو گۆڕانكارییانە ده‌دات؟

مرۆڤەكان درك بە زەرورەتی ئەو گۆڕانكارییانە دەكەن، وباوەڕیان پێی هەیە و دواتر بەڵێن بە خۆیان و كەسانی تر دەدەن پشكی هەرە زۆرو گەورەی ئەو گۆڕانكارییانە دەكەوێتە ئەستۆیان، بۆ نموونە، كاتێك مێژووی هاوڕێیەتی دوو مرۆڤی  ڕەگەز جیاواز دەبێتە واقع و ڕێگری لێ دەكرێت لەلایەن كەسانێكەوە كە نە لە خودی گرنگێتی وپێویستی پەیوەندییەكە تێ دەگەن ونە ماندوبوون لە مێژووی دروستبوونی پەیوەندییەكەدا تەنها  دەیانەوێت بیروبۆچوون و ڕای خۆیان بسەپێنن که‌ باوه‌ڕیان پێی نییه‌، ئه‌م کێشه‌یه‌ش زیاتر له‌ ووڵاته‌ رۆژهه‌ڵاتییه‌کاندا به‌دی ده‌کرێت.

دەشێت هۆكاری زۆر هەبن بۆ قبوڵ نەكردنی پەیوەندی هاوڕێیەتی کجان وکوڕان ، له‌وانه‌ داب ونه‌ریت وئاین و که‌لتوری په‌روه‌رده‌یی…………هتد، بەڵام ڕاستییەكە ئەوەیە ئەو دوو كەسەی خاوەن پەیوەندییەكەن مافی ئەوەیان هەیە بڕیار لە چارەنوسی پەیوەندییەكەیان بدەن، گرنگ ئەوەیە ئەو پەیوەندییە زیانی بۆ ئه‌و دەوروبەره‌ نەبێت كە خوازیاری ئەوە دەكەن بەهۆی میزاجیەت و بەرژەوەندی و حەزێكی تاكە كەسی و ساتەوەختی بێ بنەماوە كۆتایی بەو پەیوەندییە بهێنن لەگەڵ ئەو ڕاستییەی بڕیاردان لەو پەیوەندییە, بەمەبەستی پاراستنی ئەركی دوولایەنەیە و بوێری  و بەهێزی هەردووكیانی دەوێت ، نەك پێداگیری لایەك.

گرنگ بڕیاردانی لایەك لەسەر حسابی ئەوی دی نەبێت بۆ پاراستنی كەسانی دیكە؛ چونكە بەو شێوەیە راستگۆیی نامێنێ و بەرژەوەندی لایەك بەسەر ئەوی تردا دێتە ئاراوە و لە هەمان كاتدا ماف خواردن و ستەمكاری بۆ لایەك دەخوڵقێنێ.

بوونی ئەو پەیوەندییانە یەكێكە لە سادەترین مافی مرۆڤەكان كە پێویستە بیپارێزن و داكۆكی لێ بكەن، بەواتایەكی دیكە خودی مرۆڤەكان خۆیانن بڕیاردەر دەبن لە چارەنووسی پەیوەندییەكەیان كە لاواز دەبن یان بەهێز لە بەرامبەر خودی ئەو بیروباوەڕەی هەڵگرین، چونكە دواجار كۆڵدان وپاشگەزبونەوە لەو بیروباڕەیان، نەك شكست بە پەیوەندییەكە دەهێنێ، نەك دەبنە هۆی دڵ شكاندن وبێ متمانەیی  یەكێكیان لەبەرامبەر ئەوی دی؛ بەڵكو بچوكردنەوەی خۆیان و لاوازبونی كەسایەتییان نیشان دەدات لەبەرامبەر خودی خۆیان، بەوەش بێ ئومێدی نەك بۆ خۆیان، بەڵكو پرسیار دەخاتە سەر كۆی پەیوەندییە مرۆییەكان و ده‌رئه‌نجام هیچ گۆڕانكارییەك نایه‌ته‌ ئاراوە، بەوەش كۆمەڵ هیچ پێشكەوتن و گەشەكردنێك بەخۆیەوە نابینێت و متمانەش لاواز دەكات لە نێوان مرۆڤەكاندا.

بابه‌تی تر بابه‌تی هاوشێوه‌

Loading Facebook Comments ...

وه‌ڵامێك بنووسه

ئیمه‌یڵه‌كه‌ت بڵاو ناكرێته‌وه‌.

Pin It on Pinterest

بڵاوی بكه‌وه له:

بڵاوی بكه‌وه

بڵاوی بكه‌وه له‌گه‌ل هاورێكانت!